کاتی گەیشتنی پارەی مووچە ئاشکرا دەکرێت

دوای ئەوەی رۆژی پێنج شەممە تەیف سامی، وەزیری دارایی حکومەتی فیدڕاڵ واژۆی لەسەر بڕیاری خەرجکردنی مووچەی مانگی شەشی مووچەخۆرانی هەرێم کرد، چاوەڕوان دەکرێت سبەی پارەی مووچەی مووچەخۆرانی هەرێم بخرێتە سەر هەژماری وەزارەتی دارایی هەرێم.

سەرچاوەیەک لە وەزارەتی دارایی هەرێم بە پایتەخت میدیای ڕاگەیاند، هیچ بەربەستێک لە بەردەم ناردنی مووچەی مانگی حوزەیرانی مووچەخۆرانی هەرێم نەماوە و چاوەڕوان دەکەین تاوەکو سبەی نیوەڕۆ، وەزارەتی دارایی فیدڕاڵ پارەکە بخاتە سەر هەژماری وەزارەتی دارایی هەرێم.

ئەو سەرچاوە ئاماژەی بەوەکرد، وەزارەتی دارایی هەرێم ئامادەکاری تەواوی خۆی کردووە بۆ دابەشکردنی مووچە و دوای گەیشتنی پارەکە، لیستی مووچە ڕادەگەیەندرێت و بە ئەگەری زۆر، لیستەکە بە هەمان شێوەیە مانگەکانی رابردوو دەبێت.

پایتەخت میدیای زانیویەتی، تەواوی بانکەکانی بەشدار لە هەژماری من، ئامادەکارییەکانی خۆیان دەستپێکردووە بۆ پڕکردنەوەی ئامێرەکانی پارە ڕاکێشان، بۆ ئەوەی لە دوای گەیشتنی پارەی مووچە لە بەغداوە، راستەوخۆ ئەوان مووچەی مووچەخۆران بخەنە سەر هەژمارەکانیان.