ژمارەیەک سەربازی ئیسرائیلی کەوتنە بۆسەیەکی چەکدارانی حەماس
لە غەززە چەکدارانی حەماس گورزێکی کوشندەیان لە سەربازانی ئیسرائیل دا
لە میانەی ئۆپەڕاسیۆنی داگیرکردنی کەرتی غەززە، شەڕ لە نێوان سوپای ئیسرائیل و چەکدارانی حەماس ڕوویدا و ژمارەیەک سەربازی ئیسرائیل کەوتنە بۆسەوە.
ئەمڕۆ شەممە، ئاژانسی ئەنادۆڵ بڵاوکردەوە، لە گەڕەکی زەیتوونی رۆژهەڵاتی غەززە، شەڕ و پێکدادان لە نێوان سوپای ئیسرائیل و چەکدارانی حەماس دەستی پێکرد و ژمارەیەک لە سەربازانی ئیسرائیل کەوتوونەتەوە بۆسەوە و بەهۆییەوە سەربازێکی ئیسرائیل کوژراوە، 11ـی دیکەی بریندار بوون و 4ـی دیکەش بێسەرووشوێنن، کە گومان دەکرێت کەوتبنە ژێر دەستی حەماس.
لە ڤیدیۆیەکدا دەرکەوتووە، کە هەلیکۆپتەرێک بۆ بەهاناوەچوون و گواستنەوەی برینداران روو لە گەڕەکی زەیتوون دەکات، هاوکات دوای ئەم ڕووداوە، میدیای ئیسرائیلیش باس لەوە دەکەن، سوپا دەستی بە كشانەوە لەو گەڕەکە و دەوروبەری کردووە.
ئەمە لە کاتێکدا، ئیسرائیل بڕیاری داگیرکردنی تەواوی کەرتی غەززەی داوە و وردە وردە هەوڵ دەدەن دەست بەسەر گەڕەکەکانی ئەم کەرتەدا بگرن، هاوکات دوێنێ هەینیش ئیسرائیل غەززەی بە "ناوچەی مەترسیداری شەڕ" لە قەڵەم دا.
