وادەیەک بۆ سەردانیکردنی کەسوکاری گیراوانی هێزەکانی دووپشک داندرا
هەواڵێکی دڵخۆشکەر بۆ کەسوکاری هێزەکانی دووپشک لە شەڕەکەی لالەزار
دەستەی مافی مرۆڤ وادەیەک بۆ سەردانیکردنی کەسوکاری ئەو گیراوانەی لە شەڕەکەی لالەزار دەستبەسەر بوون ڕادەگەیەنێت.
ئەمڕۆ هەینی سلێمان موحسین، گوتەبێژی دەستەی سەربەخۆی مافی مرۆڤ لە بڵاوکراوەیەکدا ڕایگەیاند، ئاگاداریەک لەدەستەی سەربەخۆی مافی مرۆڤ بۆ خانەوادەی ئەو کەسانەی کە ئەندامی هێزەکانی دوو پشک بوون و ئێستا لای ئاسایشی سلێمانی ڕاگیراون.
جەخت لەوەشدەکاتەوە، لەبەردەوامی هەوڵەکانی دەستەی سەربەخۆی مافی مرۆڤ بۆ سۆراخ کردنی ئەو کەسانەی تا ئێستا چارەنوسیان دیار نەبووە یان سەردانیان نەکردوون.
گوتەبێژی دەستەی مافی مرۆڤ کەسوکاری ڕاگیراوان ئاگادار دەکاتەوە، خانەوادەی بەڕێزی ئەو کەسانە ئاگادار دەکەینەوە کە ئەندامی هێزەکانی دوو پشک بوون و لە شەڕەکەی 22ـی ئاب لەلالەزار بەشداربوون و ئێستا لای ئاسایشی سلێمانی ڕاگیراون.
وادەی سەردانیکردنەکە ئاشکرا دەکات، بەسوپاسەوه دوای هەماهەنگی کردن لەگەڵ دەزگای ئاسایشی گشتی سلێمانی ئاگاداریان کردینەوە کە ڕۆژانی یەکشەمەو دووشەمەی داهاتوو کە هاوکاتە لەگەڵ 1 و 2ــی 9ــی 2025، کەس و کاریان دەتوانن سەردانی کوڕەکانیان بکەن.
