شاخەوان عەبدوڵڵا وەڵامکی تووندی ڕێبوار تەها دەداتەوە
جێگری سەرۆکی پەرلەمان وەڵامێکی ڕەخنەگرانەی تووند دەداتە پارێزگاری کەرکووک
جێگری سەرۆکی پەرلەمان پەیامێک بە پارێزگاری کەرکووکەوە دەدات و دەڵێت: "دوای ١٦ ی ئۆکتۆبەر تا ساڵی 2021 لە بەغدا بووی رۆژانە سووکایەتی بەئاڵای کوردستان دەکرا، بەڵام من وێڕای هەموو هەڕەشەکان ئاڵام هێنایەوە کەرکووک".
دەقی وەڵامەکەی شاخەوان عەبدوڵڵا بۆ ڕێبوار تەها:
وەڵامێک بۆ بەڕێز رێبوار تەها …
سەرەتا وەک ئەوەی ئێوە کەسانێک بن هیچ هەڵەو کوموکوڕیتان نییەو نابێت کەس رەخنەتان لێبگرێت ، ئەوەتا هەفتەیەکە خۆت و کابرایەک کە لە ئەنجومەنی پارێزگایە وازتان لەهەموو ئەرکێکتان هێناوە خەریکی وەڵامدانەوەی منن ، خۆزگە لەجیاتی ئەو هەموو بێڕێزیی و وەڵامکارییە نوسراوێکت ئاراستەی وەزارەتی کارەبا دەکردو دەتگوت فەرموو کاک شاخەوان ئیتر خۆت و خەڵکی ئەو ناوچانە نیگەران مەبن ئەو بڕیارەم هەڵوەشاندەوە کە تائێستا نەتکردوە.
لەوەڵامی دواین لێدوانیشتان بۆ کەنالی ٨ کە دەڵێیت یەک پڕۆژەی پەرلەمانتار شاخەوان عبداللە بڵێن کە بۆ کەرکوکی کردبێت ، پێش ئەوەی وەڵامت بدەمەوە ئەوەی من بناسێت دەزانێت حەزم بەململانێ و شەڕە دەنوک لەبینی خۆمان وەکو کورد نییە و شەڕی من لەگەڵ خەڵکی شۆڤێنی داگیرکەرە.
بۆ ئەو بابەتەش بەم چەند خاڵە وەڵامت دەدەمەوە :
یەکەم / جەنابت دەڵێیت کاک شاخەوان چی کردوە بۆ کەرکوک ، گەورەترین پرۆژەی من لەکەرکوک هەمواری یاسای هەڵبژاردنی ئەنجومەنی پارێزگاکان بو بەشێوەیەک کە لەکەرکوکیش هەڵبژاردن ئەنجام بدرێت و راکان نەمێنێت و جەنابت ببیتە فەرمانبەری پارێزگای کەرکوک کە ٢٠ ساڵە هەڵبژاردن نەکراوە.
دووەم / لەهەمووی گرنگتر جەنابت و ٥ پەرلەمانتاری تری کورد لەدوای ١٦ ی ئۆکتۆبەر تا ساڵی ٢٠٢١ لە بەغدا بون بەڵام رۆژانە سوکایەتی بەئاڵای کوردستان دەکراو ئەگەر میدالیای قەد ئاوێنەی سەیارەش بوایا لێیان دەکردەوە ، بەڵام من وێڕای هەموو هەڕەشەکان لەمانگی ٩ ی ساڵی ٢٠٢١ ئاڵام هێنایەوە کەرکوک و سەرەتا لەسەر نوسینگەی خۆم هەڵمدا و دواتریش بۆسەر بارەگاکانی پارتی دوای گەرانەوەیان بۆ کەرکوک.
سێیەم / یەکێکی تر لەپرۆژە گەورەکانی کەرکوک و دەوروبەری تامەندەلی و خانەقین هەڵوەشاندنەوەی بڕیارەکانی بەعس و گەرانەوەی زەوییەکانە بۆ خاوەنە رەسەنەکانیان.
چوارەم / پرۆژەی گەیاندنی خزمەتگوزاری بۆ گەڕەکە کوردییەکان کە خەڵکی کەرکوک باش دەزانن رێگە نەدەدرا پرۆژەیان بۆ بکرێت بەبیانوی ئەوەی ئەو گەڕەکانە تەجاوزن ، بەڵام لەمانگی ٤ ی ساڵی ٢٠٢٢ نوسراوێکمان ئاراستەی سەرۆک وەزیرانی پێشو کازمی کرد کە ئەو گەڕەکانە واقع حالن و لەسەر ئەساسی ئەوە بڕیاردرا پرۆژەکانیان دەرج بکرێت و دەست کرا بەدروست کردنی شەقام و کۆنکریت کردنی گەرەکە کوردییەکان.
پێنجەم / پڕۆژەی ئاوی پەنجا علی کە ٢٠ ساڵە ئاوی شۆر دەخۆن و بێ ئاوبون ، ئێمە سەرەڕای رێگرییەکانی راکان جبوری ئەو پرۆژەیەمان ئەنجامداو ڕەزامەندی وەزیری شارەوانیمان هێناو تێچوەکەیشی دابین کرا ، سوپاس بۆ خودا کێشەی کەم ئاوی لەو گەرەکە چارەسەر کرا ، جگە لەوە پرۆژەی لێدانی چەندین بیر لەگەرەکی رزگاری ( فیلەق ) ، هەروەها کۆنکریت کردنی سەدان کۆڵان و دابین کردنی دەیان محاویلەی کارەبا بۆ گەڕەکە کوردییەکان و ئەنجامدانی شەقامی جوت سایدی پەنجا علی کە لەگەڕەکێکی ترەوە گواستمانەوە بۆ پەنجا علی و دەیان پرۆژەی تر.
شەشەم / لەسەر ئاستی نەتەوەیی سەرلەنوێ زیندوو کردنەوەی مادەی ١٤٠ دوای ١٢ ساڵ لە راگرتنی و دەست پێکردنەوە بەقەرەبوکردنەوەی هاوڵاتیان و هێنانی بڕیاری پارچە زەوییەک بۆ ئاوارەکان.
حەوتەم / تێپەڕاندنی یاسایی بەپارێزگابوونی هەڵەبجە.
هەشتەم / هەموواری هەردوو پرۆژە یاسایی شەهیدان و زیندانیانی سیاسی لەبەرژەوەندی خەڵکی کوردستان.
نۆیەم / وەرگرتنەوەی ٣٧٥ ملیار دیناری جوتیارانی کوردستان هی ساڵەکانی ١٤ و ١٥ و ١٦ و جێکردنەوەی لەیاسای ئاسایشی خۆراک.
دەیەم / نەهێشتنی سەربازگەی شۆراوو مداهەمەی گەڕەکە کوردییەکان لەنیوەی شەودا ، ئەمەو سەدان پرۆژەی تری گەورە کەبەهەموو ئەو بەرپرس و ناوە گەورانەی کورد نەکرا لە بەغدا بون ئێمە کردمان.
یازدە / تەرخان کردنی بودجە بۆ لیوای ٢٠ ی هاوبەش و تەواوکردنی مامەڵەکانیان کە بەهۆیەوە ٣٧٠٠ گەنجی ئیمە دامەزران.
دەی ئەوە بەشێکی کەمە لەپرۆژەکانی من بەڵام جەنابت پێم بڵێ جگە لە هەڵگرتنەوەی کلینس مەقەبا و تەسلیم کردنی قەزای دووبزو داقوق و پۆلیس و بەرێوەبەرایەتی کشتوکاڵی کەرکوک بەبرایانی حەویجە ماوەی ساڵێکە چی پرۆژەیەکی ترت کردوە بۆ کەرکوک ، من رێبوارێکم دەویست قائد بێت نەک مۆزەف .
لەکۆتاییدا خۆزگە لەپاڵ وەڵامدانەوەی من وەڵامێکی دواین بابەتی محمد تمیم تان دەدایەوە یاخود وەڵامی حلبوسیتان دەدایەوە کە لەناو کەرکوک و لەشارێکی زۆرینە کوردیدا سوکایەتی بەحوکمی کوردی و سەرکردەکانی کورد کرد .
