ئەنجوومەنی باڵای فەتوا: هیچ بابەتێكی ناشەرعی لە مەولودنامەدا ناخوێندرێتەوە
ڕۆژی لەدایکبوونی بێغەمبەری ئیسلام نزیکبووەتەوە و ئەنجوومەنیش چەند فەتوایەکی دەکرد
ئەنجوومەنی باڵای فەتوای هەرێمی کوردستان بۆ ڕۆژی لەدایکبوونی پێغەمبەری ئیسلام چەند فەتوایەک دەخاتەڕوو.
ئەنجوومەنی باڵای فەتوای هەرێمی کوردستان بڵاویکردەوە، پاش ئه‌وه‌ی كۆمه‌ڵێك له مامۆستایان و هاووڵاتییانی داوایان كرد، كه ئه‌نجوومەن حوكمی ئاهه‌نگی مه‌ولودنامه له روانگه‌ی شه‌ریعه‌تی ئیسلامه‌وه روون بكه‌ینه‌وه، بۆیە كۆی ده‌نگ ئه‌م فه‌توایه‌ی خواره‌وه‌ی دا:
یه‌كه‌م: مەولودنامە عورفێكی شەرعی جوانەو بایەخدان پێی، كارێكی باشە، بەو پێیەی یادی ژیانی پێغەمبەری ئیسلام دەكرێتەوەو بیرو باوەڕی ئایینی بەهێز دەكات.
دووەم: دەربڕینی دڵخۆشی بۆ لە دایكبوونی پێغەمبەری ئیسلام، خۆی لەخۆیدا جێبەجێكردنی فەرمانی خوایە كە هاتنی ئەو پێغەمبەرە مایەی ڕەحمەتە بۆ خەڵكی جیهان، هەر شتێكیش ڕەحمەت بێت، بە بەڵگەی قورئان باوەڕداران پابەندن كە دڵیان پێ خۆشبێت.
سێیەم: خوێندنەوەی مەولود هۆكارێكە بۆ زیاتر ئاشنابوون بە ناسینی كەسایەتیی محەممەدو ژیاننامەكەی.
چوارەم: رۆژی لە دایكبوونی نێردراوانی خودا، گرنگترین و گەورەترین ڕووداوی ڕۆژگاری خۆیانن، یادكردنەوەی ئەو ڕۆژە پیرۆزانە بە بەڵگەی قورئان فەرزە. لە فەرموودەی سەحیحی پێغەمبەردا هاتووە، ڕۆژی لە دایكبوونی، هەمان ڕۆژی بوونی بە پێغەمبەر و هەمان ڕۆژی ناردنی قورئانە بۆی، بۆیە بە هەموو پێوەرەكان، 12ـی ڕەبیعی یەكەمی ساڵی كۆچی، ڕۆژێكی پیرۆز و ڕێزلێگیراوە.
پێنجەم: هیچ شتێك و بابەتێكی ناشەرعی لە مەولودنامەدا ناخوێندرێتەوە، پێچەوانەی ئەوانەی كە دەڵێن بابەتی بیدعە و نادروست لەخۆدەگرێت.
شەشەم: بە درێژایی مێژووی ئیسلام چەندین سەركردەو زانای ناوداری ئایینی پیرۆزی ئیسلام، ئەو یادەیان بەرز ڕاگرتووە، خەڵكی باوەڕداری كوردستانیش لەسەر هەمان ڕێچكە و ڕێبازی پیرۆز بەردەوام دەبن.
شایەنی باسە، رۆژی پێنجشەممە 4ـی9ـی 2025، رۆژی لە دایكبوونی پێغەمبەری ئیسلامە بەم بۆنەیەوە لە سەرجەم دامودەزگا حكومییەكانی هەرێمی کوردستان پشووی فەرمییە.
