سەرۆکی شارەوانی هەولێر: پارەی تاپۆکردنی زەوی فەرمانبەران وەردەگیرێت

دوای ئەوەی دەنگۆی وەرنەگرتنی پارەی بە تاپۆکردنی زەوی فەرمانبەران بڵاوبووەوە، سەرۆکی شارەوانی هەولێر ڕوونکردنەوە دەداتە.

ئەمڕۆ پێنجشەممە کارزان هادی، سەرۆکی شارەوانی هەولێر دەربارەی وەرگرتنی بڕە پارەیەک لە فەرمانبەرانی سوودمەندبوو بە پایتەخت میدیای ڕاگەیاند، هیچ بڕیارێکی لێخۆشبوون لە بڕی پارەی بەتاپۆکردنی زەوی فەرمانبەران نەهاتووە و بۆ هەر مەترێک بڕی 5 هەزار دینار وەردەگیرێت.

بەگوێرەی بڕیاری ئەنجوومەنی وەزیرانی هەرێمی کوردستان تەواوی فەرمانبەرانی شارستانی و سەربازی بەشێوەی تیروپشک زەوییان بەسەردا دابەش دەکرێت.

سەرۆکی شارەوانی هەولێر جەختیش لەوەدەکاتەوە، ئەم بڕە پارەیە تەنیا ڕسوماتێکە بۆ 200 مەتر ملیۆنێک دینار لە فەرمانبەران وەردەگیرێت.

لەلایەکی دیکەوە، مەریوان حاکم هادی، بەڕێوەبەری گشتی شارەوانییەکان هەر لەمبارەیەوە بە پایتەخت میدیای ڕاگەیاند، بەگوێرەی یاسای عێراقیی لە نێو شار بۆ هەر مەتری 5 هەزار وەردەگیرێت.

ئاشکرای دەکات، زەوی قەزاکانیش بۆ هەر مەترێک 3 هەزار دینارە و قەزا و ناحییەکانیش هەر مەترێک 2 هەزار دینار وەردەگیرێت.