120 ملیار دینار لە داهاتی نانەوتی بۆ بەغدا نێردرا

دوێنێ شەو نووسراوی خەرجکردنی مووچە ڕەوانەی وەزارەتی دارایی فیدراڵ کرا و ئەمڕۆش ئەو داهاتە نانەوتییەی هەولێر و بەغدا لەسەری ڕێککەوتبوون، بۆ بەغدا نێردرا.

ئەمڕۆ پێنج شەممە، سەرچاوەیەک لە وەزارەتی دارایی هەرێمی کوردستان ڕایگەیاند، دوای ئەوەی دوێنێ دەستیان بە ڕێکارەکانی  ناردنی داهاتی نانەوتی کرد بۆ عێراق کرد، ئەمڕۆ پڕۆسەکە تەواو بوو و 120 ملیار دیناری لە داهاتی نێوخۆی هەرێم خرایە سەر هەژماری وەزارەتی دارایی فیدراڵ لە لقی هەولێری بانکی ناوەندیی عێراق.

هەر بە گوێرەی ئەم سەرچاوەیە، ئێستا ئەوەی ماوەتەوە بەپێی ڕێککەوتن، دەبێت بەغدا مووچەی مانگی 6ـی فەرمانبەرانی هەرێم بنێرێت، چونکە هەرێمی کوردستان هەموو پابەندییەکانی خۆی بەرامبەر بەغدا جێبەجێ کردووە.

ئەمە لە کاتێکدایە دوو ڕۆژ لەمەوبەر، لە کۆبوونەوەی ئەنجوومەنی وەزیرانی عێڕاق بڕیار درا، مووچەی مانگی 6ـی مووچەخۆرانی هەرێمی کوردستان خەرج بکرێت، بەو مەرجەی حکومەتی هەرێم بڕی 120 ملیار دینار لە داهاتی نێوخۆ بنێرێت.