کارکردن لەسەر هێرشەکەی لالەزار قەدەغە کرا!

بە فەرمانی راستەوخۆی بافڵ تاڵەبانی، میدیاکان چیتر بۆیان نییە لەسەر رووداوەکەی لالەزار کار بکەن و ئەمڕۆ رێگری لە چەندین میدیا کراوە

بۆ کپکردنی دەنگی ئازاد و شاردنەوەی ڕاستییەکانی هێرشەکەی سەر لالەزار، هێزەکانی یەکێتی لە سلێمانی چاودێرییەکی چر میدیاکان دەکەن و هۆشداریان بە چەندین رۆژنامەنووس داوە، کە نابێت چیتر کار لەسەر رووداوەکانی لالەزار بکەن و تەواوی ئەو ڤیدیۆ، لێداوان و لایڤانەشیان پێ سڕیونەتەوە کە ئەنجامیان داوە.

هێزەکانی یەکێتی، دوای سێ رۆژ لە رووداوەکانی لالەزار، دەیانەوێت رێگری تەواوی لە گواستنەوە زانیارییەکان بکەن و یەکێک لە دەرەنجامە مەترسیدارەکانی ئەم ڕێگرییانە، شاردنەوەی چارەنووسی دەیان چەکداری هێزی دووپشکە، کە تاوەکو ئێستا هیچ زانیارییەکیان لەبارەوە نییە.

بە سنووردارکردنی کاری میدیاکان، یەکێتی دەیەوێت پرسیارەکان لەبارەی ژمارەی کوژراوان و چارەنووسی ونبووەکان کپ بکات و ڕێگە نەدات ڕای گشتی و کەسوکاری قوربانییەکان لە ڕاستییەکان ئاگادار بن، ئەمەش پێشێلکارییەکی ئاشکرای مافەکانی مرۆڤە.

ئەم هەنگاوانەی یەکێتی تەنها پەیوەست نییە بە ڕووداوی لالەزارەوە، بەڵکو پەیامێکی ڕوونی ترس و تۆقاندنە بۆ تەواوی میدیای ئازاد لە سنووری دەسەڵاتیاندا. یەکێتی بەم کارە دەیسەلمێنێت کە هەر دەنگ و میدیایەک هەوڵی ئاشکراکردنی ڕاستییەکان بدات، لە رێگەی هێزەکانییەوە ڕووبەڕووی فشار و لێپێچینەوەی توند دەبێتەوە، ئەم بەرتەسککردنەوەی ئازادی ڕادەربڕینەش، بەشێکە لە سیاسەتی نوێی حزبەکەی کە هیچ حیسابێک بۆ خەڵک و یاسا ناکات.