سەرۆکوەزیرانی عێراق لە ڕێوڕەسمی یادی لەدایکبوونی پێغەمبەری ئیسلام (د.خ)دا، پڕۆژە نیشتمانییەکانی حکومەتەکەی دەخاتە ڕوو.
ئەمڕۆ عەلی فالح زەیدی، سەرۆکوەزیرانی عێراق، لە ئاهەنگی دیوانی وەقفی سوننەیی لە بەغدا ڕایگەیاند، بەبۆنەی لەدایکبوونی پێغەمبەر (د.خ)، پیرۆزبایی لە گەلی عێراق و جیهانی ئیسلامی دەکات و ئاماژەی بەوە کرد، کارنامەی حکومەتەکەی بە ڕوونی جەخت لەسەر بنیاتنان، چاکسازی، شەڕی دژ بە گەندەڵی و ڕەخساندنی ژینگەیەکی لەباری کارکردن دەکاتەوە.
سەرۆکوەزیرانی عێراق سوپاسی مەرجەعیەتی باڵای ئایینی و سەرجەم دامەزراوە ئایینییەکانی کرد بۆ ڕێنماییەکانیان لەپێناو پاراستنی ئاسایشی وڵات. زەیدی ئاماژەی بەوەش دا، دامەزراوە ئەمنییەکان تەنیا لە چوارچێوەی دەستووردا کار دەکەن و عێراقیش نابێتە جێگەیەک بۆ زیانگەیاندن بە وڵاتانی تر.
لە بەشێکی دیکەی گوتارەکەیدا، سەرۆکوەزیرانی عێراق پشتڕاستی کردەوە کە عێراقییەکان لە 30ی ئەیلوولی ئەمساڵدا، لە دوای کشانەوەی هێزی هاوپەیمانان بۆ وڵاتەکانی خۆیان، بەتەواوی سەروەریی خۆیان بەسەر تەواوی خاکی وڵاتەکەیاندا ڕادەگەیەنن.
ئەم لێدوانانە لە کاتێکدان، ناوچەکە بەهۆی گرژییە بەردەوامەکانەوە تووشی دابەشبوونی سیاسی بووە؛ سەرۆکوەزیرانی عێراقیش جەخت لە گرتنەبەری ڕێبازی پێغەمبەر دەکاتەوە بۆ بەدیهێنانی یەکڕیزیی و پاراستنی ئارامی و ئاسایشی وڵاتەکە.
