پۆلیسی دارستانی سلێمانی: هۆکاری ئاگرکەوتنەوەکەی گۆیژە دیار نییە
پۆلیسی دارستانی سلێمانی لەسەر ئاگرەکەی چیای گۆیژە هاتە دەنگ.
دوای چەندین کاتژمێر لە ئاگرە گەورەکەی چیای گۆیژە بەرەبەیانی ئەمڕۆ تیمەکانی پۆلیسی دارستان و بەرگری شارستانی، بە هاوکاری هاووڵاتییانی خۆبەخش توانییان ئاگرەکە بە تەواوی کۆنتڕۆڵ بکەن.
ئەمڕۆ بەڕێوەبەرایەتی پۆلیسی دارستان و ژینگەی پارێزگای سلێمانی بڵاویکردەوە، شەوی ڕابردوو بە هۆکارێکی نادیار ئاگرێک لە چیای گۆیژە کەوتەوە، دەستبەجێ مەفرەزەکانی پۆلیسی دارستان شان بەشانی تیمەکانی بەرگری شارستانی و هاووڵاتییانی خۆبەخش کەوتنە کار بۆ کوژاندنەوەی ئاگرەکە.
بەپێی ڕاگەیەندراوی پۆلیسی دارستان، دوای هەوڵێکی زۆر و بەربەردەوامی هەموو لایەک، بەرەبەیانی ئەمڕۆ ئاگرەکە کۆنتڕۆڵ کرا، تا ئێستا قەبارەی زەرەر و زیانەکانی ڕووداوەکە دیاری نەکراوە.
درەنگانی شەوی ڕابردوو، لەناکاو ئاگرێکی گەورە لە بەشێکی چیای گۆیژە کەوتەوە، دەستبەجێ هاووڵاتییان شان بە شانی لایەنە پەیوەندیدارەکان بەشێوەی خۆبەخشانە بۆ کۆنترۆڵکردنی ئاگرەکە چوونە چیاکە.
