کوێت: ئێران وڵاتێکی شەڕانگێزە
وەڵامی کوێت بۆ ئێران لەدوای هێرشە بەردەوامەکانی بۆ سەر وڵاتەکەی.
تاران وەکو وەڵامێک بۆ ئەمریکا، شەپۆلێکی نوێی هێرشی ئاسمانیی کردە سەر وڵاتانی کەنداوی دراوسێی و دۆخەی ئاڵۆزتر کرد.
ئەمڕۆ وەزارەتی دەرەوەی کوەیت ڕایگەیاند، هێرشە بەردەوامەکانی ئێران بۆ سەر دامەزراوە مەدەنییەکان، نیشانەی ئەو پڕۆگرامە شەڕانگێزەی ئێرانە کە بەکاری دەهێنێت و ژێرخانە سەرەکییەکان بە ئامانج دەگرێت، ئەمەش ژیانی هاووڵاتییان دەخاتە مەترسییەوە.
وەزارەتی دەرەوەی کوەیت جەختیشی لەوە کردەوە، بە تووندترین شێوە ئیدانەی ئەم هێرشانە دەکات کە ئێران ئاراستەی وێستگەکانی کارەبا و کێڵگە نەوتییەکانی وڵاتەکەی کرد، کە بەهۆیەوە زیانێکی زۆری مادی، قوربانی و ئاگرکەوتنەوەی لێ کەوتەوە.
لەلایەکی دیکەوە فڕۆکەخانەی نێودەوڵەتیی وڵاتەکە ڕایگەیاند، لەدوای ڕاوەستانی سەرجەم گەشتە ئاسمانییەکان لە فڕۆکەخانەکە بەهۆی هێرشە مووشەکی و درۆنییە بەردەوامەکانی ئێران، دووبارە کاتی سەرجەم گەشتە ئاسمانییەکانی ڕێکخستووەتەوە.
وڵاتی ئێران وەکو وەڵامێک بۆ هێرشە مووشەکییەکانی ئەمریکا بۆ سەر وڵاتەکەی، شەپۆلێکی هێرشی درۆنی و مووشەکیی ئاسمانیی ئاراستەی دامەزراوە ئەمریکییەکان کرد لە وڵاتانی کوێت و بەحرەین؛ هەروەها تەلەفزیۆنی ئێران لە تۆڕی کۆمەڵایەتیی تێلیگرام بڵاوی کردەوە کە کۆگایەکی تەقەمەنییان لە بنکەی عەدیرە لە کوێت و بیناکانی بارەگا و کۆگاکانی تەقەمەنی لە بنکەی عەلی ئەلسالم و چەندین پردی پەیوەندیکردنیان کردە ئامانج.
