وەزارەتی خوێندنی باڵا لەسەر کەیسی د. عەبدولەتیف هاتە دەنگ
وەزارەتی خوێندنی باڵا ڕێکارە یاساییەکانی لەسەر دۆسیەی لێکۆڵینەوەی د. عەبدولەتیف ئەحمەد دەستپێکرد.
دوای تەواوبوونی لێکۆڵینەوەکانی زانکۆی سلێمانی، دۆسیەکەی د. عەبدولەتیف ئەحمەد گەیشتە وەزارەتی خوێندنی باڵا و لە ئێستادا تیمی یاسایی وەزارەت سەرقاڵی گرتنەبەری ڕێوشوێنی یاساییە لەسەر بابەتەکە.
بەڕێوەبەرایەتی کاروباری یاسایی لە وەزارەتی خوێندنی باڵا و توێژینەوەی زانستی ڕایگەیاند، ئەمڕۆ یەکشەممە دۆسیەی لێکۆڵینەوەی د. عەبدولەتیف ئەحمەد مستەفا گەیشتووەتە وەزارەت و لەسەر فەرمانی وەزیر، دەستبەجێ ڕێکارە یاساییەکان لە چوارچێوەی یاسا و ڕێنماییە بەرکارەکاندا بەرامبەر ئەم دۆسیەیە دەستیان پێکردووە.
بەپێی ڕوونکردنەوەکەی بەڕێوەبەرایەتی کاروباری یاسایی، ئەم دۆسیەیە پێشتر لەلایەن زانکۆی سلێمانی و بە ئامادەبوونی نوێنەری داواکاری گشتی لێکۆڵینەوەی پێویستی لەبارەوە ئەنجام درابوو، ئەمڕۆ لە کاتی دەوامی فەرمیدا ڕادەستی وەزارەت کراوە.
لە کۆتایی ڕوونکردنەوەکە ئەوەش هاتووە، تیمی بەڕێوەبەرایەتی یاسایی و بەرپرسانی پەیوەندیدار لە وەزارەتی خوێندنی باڵا پڕۆسەی پێداچوونەوە و مامەڵەکردنی یاساییان لەگەڵ ناوەڕۆکی دۆسیەکەدا دەستپێکردووە بۆ یەکلاییکردنەوەی بابەتەکە بەپێی یاسا.
