چیرۆکی ئەو گامێشەی بەنگلادیشی هەژاندووە

گامێشێکی سپی (ئەلبینۆ) لە وڵاتی بەنگلادیش کە بەهۆی هاوشێوەیی لەگەڵ دۆناڵد ترەمپ ناوبانگی دەرکردبوو، لە دوا ساتەکانی پێش جەژنی قوربان لە سەربڕین ڕزگار کرا.

لەگەڵ نزیکبوونەوەی جەژن، گامێشەکە بە کڕیارێک فرۆشرابوو تا بکرێتە قوربانی، بەڵام سەڵاحەدین ئەحمەد، وەزیری ناوخۆی بەنگلادیش، بەهۆی "نیگەرانی ئەمنی" فەرمانی دا ئاژەڵەکە ئازاد بکرێت و کڕیارەکەش قەرەبوو بکرێتەوە.

خاوەنی گامێشەکە ئاماژەی بەوە کردووە کە ناوی ئەم ئاژەڵەیان ناوە دۆناڵد ترەمپ تەنیا بەهۆی شێوازی قژە نایابەکەیەوە. لە ئێستادا گامێشەکە گوازراوەتەوە بۆ باخچەی ئاژەڵانی نیشتمانی لە داکای پایتەخت تا وەک دەگمەنترین جۆری گامێش پارێزگاری لێ بکرێت.

ئەم ئاژەڵە کە کێشەکەی 700 کیلۆگرامە، بەهۆی هەبوونی قژێکی زەرد و بژ، لە تۆڕە کۆمەڵایەتییەکان بە "دۆناڵد ترەمپ" ناسرابوو و ڕۆژانە خەڵکێکی زۆر بۆ وێنەگرتن سەردانیان دەکرد.