گەرمای تاقەتپڕوکێن لە ڕێگایە؟ دوایین پێشبینییەکانی کەشوهەوا

کەشناسی هەرێم کەشوهەوای پێشبینیکراوی 48 کاتژمێری داهاتووی لە شار و ناوچە جیاوازەکانی هەرێمی کوردستان ڕاگەیاند.

ئەمڕۆ دووشەممە، کەشناسی هەرێم ڕایگەیاند، کەشوهەوای ئەمڕۆ بە گشتی ساماڵ و پەڵە هەور دەبێت، ئاراستەی با بەرەو باکووری ڕۆژئاوا و خێراییەکەشی لەسەرخۆ بۆ مامناوەند لە نێوان 10 بۆ 20 کم لە کاتژمێرێکدا دەبێت، هەروەها مەودای بینین لە نێوان 8 بۆ 10 کم دەبێت و پلەکانی گەرما نزیک دەبنەوە لە تۆمارکراوەکانی دوێنێ. بەرزترین پلەی گەرما لە گەرمیان 38 پلە و لە هەولێر 34 پلەی سیلیزی دەبێت، لە کاتێکدا نزمترین پلەی گەرما لە حاجی ئۆمەران تۆمار دەبێت کە 21 پلەیە.

بۆ سبەی سێشەممە، پێشبینی دەکرێت ئاسمان بە هەمان شێوە ساماڵ و پەڵە هەور بێت، بەڵام پلەکانی گەرما بەراورد بە ئەمڕۆ کەمێک بەرزبوونەوە بەخۆیانەوە دەبینن بە ڕێژەی 1 بۆ 2 پلە، هەروەها خێرایی با لەسەرخۆ دەبێت و لە نێوان 5 بۆ 15 کم لە کاتژمێرێکدا دەبێت لەگەڵ مانەوەی مەودای بینین لە نێوان 8 بۆ 10 کم، بەپێی ئەم گۆڕانکارییە پلەی گەرمای گەرمیان دەگاتە 39 پلە و هەولێر دەبێتە 35 پلە، لە کاتێکدا حاجی ئۆمەران دەگاتە 22 پلەی سیلیزی.