حزبوڵڵای لوبنان چەکێکی نوێ لە دژی ئیسرائیل بەکاردەهێنێت

لە نوێترین پێشهاتدا لە لوبنان، حزبوڵڵا درۆنێکی نوێ بەکار دەهێنێت، کە ئیسرائیل ناتوانێت بە سیستەمی ئەلیکترۆنی ڕایبگرێت.

کەناڵی سی ئێن ئێن ڕایگەیاند، حزبوڵڵای لوبنان درۆنێکی نوێی مەترسیدار لە جۆری فایبەر ئۆپتیک بە ناوی "کوادکۆپتەر" بەکاردەهێنێت، کە کێشەکەی تەنیا چەند کیلۆگرامێک دەبێت و  توانای هەڵگرتنی تەقەمەنی هەیە و وێنەی زۆر روون بۆ ئامانجەکان دەگوازێتەوە.

پێچەوانەی درۆنە پێشکەوتووەکانی دیکە، ئەم درۆنە بە کێبڵ کار دەکات و درێژیی کێبڵەکەی دەگاتە 15 کیلۆمەتر، بەکارهێنەرەکەی لە شوێنێکی پارێزراوەوە کۆنترۆڵی دەکات، هاوکات بە شەپۆلی رادیۆیی و سیستەمی تێکشکاندنی ئەلیکترۆنی راناگیرێت و دەستنیشانکردنی ئەستەمە.

ڕۆژی هەینی ڕابردوو 1-5-2026، بۆیەکەمجار حزبوڵڵای لوبنان ڤیدیۆی بەکارهێنانی ئەم درۆنەی لە دژی ئیسرائیل لە تۆڕی کۆمەڵایەتی ئێکس بڵاوکردەوە و تێیدا دەردەکەوێت، درۆنەکە ئامانجەکەی دەپێکێت، بەبێ ئەوی سەربازانی ئیسرائیل هەست بە هاتنی بکە. سوپای ئیسرائیلیش دوای ڕووداوەکە لەلای خۆیەوە ڕایگەیاند، بەهۆی هێرشەکەوە سەربازێکی 19 ساڵان کوژرا و ژمارەیەکی دیکەش بریندار بوون.

سوپای ئیسرائیل بۆ ڕووبەڕووبوونەوەی فڕۆکەی بێفڕۆکەوان پشتی بە تەکنەلۆژیای خۆی دەبەستێت و شەپۆل و سیگناڵ بۆ شێواندنی درۆنەکان بەکاردەهێنێت، بەڵام بەبێ هەبوونی هیچ سیگناڵێک، سوپا ناتوانێت لە ڕێگەی ئامێری ئەلیکترۆنییەوە دەست لە کۆنتڕۆڵی درۆنی فایبەر ئۆپتیک وەربدات.