داشکاندن لە کرێی خوێندنی زانکۆ و پەیمانگا تایبەتەکان دەکرێت؟

قوتابییانی زانکۆ و پەیمانگا تایبەتەکان هاوشێوەی قوتابییانی زانکۆ و پەیمانگا حکومییەکان داوای داشکاندن لە کرێی خوێندن دەکەن و پایتەخت میدیا دەنگیان دەگەیەنێت.

دوێنێ هەینی د.ئارام محەممەد، وەزیری خوێندنی باڵا و توێژینەوەی زانستی  لەپێناو بەرژەوەندی گشتی و بە لەبەرچاوگرتنی دۆخی دارایی خانەوادەی قوتابییان بڕیاریدا، داشکاندنی کرێی خوێندن بە ڕێژەی %20 بۆ قوتابییانی زانکۆ حکومییەکانی سەرجەم ئاستەکانی خوێندنی بەرایی (بەیانییان و ئێواران) و (دیبلۆمی باڵا، ماستەر، دکتۆرا) بکرێت.

قوتابییانی زانکۆ و پەیمانگا تایبەتەکان لە ڕێگەی پایتەخت میدیاوە داوا دەکەن داشکاندن بۆ ئەوانیش لە کرێی خوێندن بکرێت.

لەمبارەیەوە عەباس ئەکرەم، گوتەبێژی وەزارەتی خوێندنی باڵا و توێژینەوەی زانستیی هەرێمى کوردستان بە پایتەخت میدیای ڕاگەیاند، تا ئێستا هیچ پلانێک بۆ زانکۆ و پەیمانگا تایبەتەکان نییە بەڵام داواکاری قوتابییان بە وەزیری خوێندنی باڵا دەگەیەنێت.

لە دەستپێکی شەڕی ئەمریکا و ئیسڕائیل دژی ئێران و هێرشی گروپە لە یاسا دەرچووەکانی عێراق بۆ سەر هەرێمی کوردستان ماوەی مانگێکە خوێندن ڕاگیراوە.

بەپێی راگەیەندراوی هاوبەشی وەزارەتی پەروەردە و خوێندنی باڵا، سبەی یەکشەممە خوێندن لەسەرجەم ناوەندەکان (حکومی ناحکومی) دەست پێدەکاتەوە.