سوودانی: ئەو کەسانەی هێرشیان کردووەتە سەر باڵیۆزخانەی ئەمریکا لە عێراق ڕاپێچی دادگەیان دەکەین

دوای ئەوەی ئەمشەو هێرشکرایە سەر باڵیۆزخانەی ئەمریکا لە بەغدا، سەرۆکوەزیرانی عێراق دەیەوێت هێرشبەران ڕاپێچی دادگە بکات و دەڵێت: "بەئامانجگرتنی باڵیۆزخانەکانی کارێکە بەهیچ شێوەیەک قبووڵ ناکرێت".

نزیکەی کاتژمێرێک لەمەوبەر، هێرشکرایە سەر باڵیۆزخانەی ئەمریکا لە بەغدا و بەم هۆیەوە سیستەمی بەرگری هاوپەیمانان بەرپەچی هێرشەکانی دایەوە و هیچ زانێکی گیانی و ماددی لێ نەکەوتەوە.

نووسینگەی سەرۆکوەزیرانی عێراق بڵاویکردەوە، محەممەد شیاع سوودانی فەرمانی بە سەرجەم سەرکردایەتی سەربازی و ئەمنی لە ناوچەکانی بەرپرسیارێتی دەرکرد، کە بەدواداچوونی ئەو کەسانە بکەن کە بەرپرسیارن لە کردەوەی تیرۆریستی هاویشتنی مووشەک بەرەو نزیک باڵیۆزخانەی ئەمریکا لە عێراق و ڕاپێچیان بکەن بۆ دادگە. 

محەمەد شیاع سوودانی ڕوونیکردەوە، بەئامانجگرتنی نێردە دیپلۆماسییەکان و باڵیۆزخانەکانی لە عێراق کارێکی بەهیچ شێوەیەک پاساو نادرێت و قبووڵ ناکرێت و لە ڕیزی ئەو کارانە دایە کە هەڕەشە لەئاسایشی نەتەوەیی و سەقامگیریی سەرتاسەری وڵات دەکات.

سەرۆکوەزیرانی عێراق ئاماژە بەوە دەدات، ئەنجامدەرانی ئەم هێرشانە پێشێلکاری دژ بە عێراق و سەروەری و ئاسایشی عێراق دەکەن، ئەو گروپە سەرپێچیکارانەی کە پابەند نین بە یاساوە بە هیچ شێوەیەک نوێنەرایەتی خواستی گەلی عێراق ناکەن.

ئەمە لەکاتێکدایە، ماوەی چەندین ڕۆژە گروپە لە یاسا دەرچووەکانی عێراق بەدرۆن و مووشەک هێرش دەکەنە سەر کوردستان بەتایبەتی شارەکانی (هەولێر و سلێمانی)، بەڵام سەرۆکوەزیرانی عێراق هیچ کاردانەوەیەکی نەبووە.