هاتووچۆی هەولێر دەنگۆی دانانی کامێری تۆمارکردنی سەرپێچی ڕەتدەکاتەوە
هاتووچۆی هەولێر لەسەر دانانی کامێرا بۆ تۆمارکردنی سەرپێچی بەکارهێنانی موبایل هاتە دەنگ
دوای بڵاوبوونەوەی دەنگۆی دانانی کامێرای تایبەت لەسەر ڕێگەی بەحرکە - هەولێر بۆ تۆمارکردنی سەرپێچی بەکارهێنانی موبایل و پشتێنی سەلامەتی، گوتەبێژی هاتووچۆی هەولێر ڕوونکردنەوە دەدات.
کەمێک پێش ئێستا هێمن ئەمین، گوتەبێژی هاتووچۆی هەولێر بە پایتەخت میدیای ڕاگەیاند، دەنگۆیەکان دوورن لە ڕاستییەوە و هیچ کامێرایەک لەسەر ڕێگەی بەحرکە دانەدراوە بۆ مەبەستی تۆمارکردنی سەرپێچیی (بەکارهێنانی موبایل و پشتێنی سەلامەتی).
هێمن ئەمین سەبارەت بە دانانی کامێرایەکی لەم شێوەیە گووتی: "لە ئێستادا زانیارییان لەسەر بوونی پلانێکی لەو شێوەیە نییە".
سەبارەت بە چاودێریکردنی شۆفێران بە ئۆتۆمبێلی تایبەتی هێمن ئەمین ئاماژەی بەوەدا، ئەگەرێکی کراوەیە و هەرکاتێک پێویست بوو ئۆتۆمبێلی تایبەت بەکار بهێنن، بەتایبەتی لەو شەقامانەی هاووڵاتییان ئۆتۆمبێل بۆ درێفت بەکار دەهێنن.
