پەیامی گرنگی سەرۆک بارزانی
لە گەورەترین خۆپیشاندانی ئەوروپا بۆ پشتگیریکردن لە کوردانی ڕۆژئاڤا، پەیامی سەرۆک بارزانی لەسەر ڕێكکەوتنی نێوان هەسەدە و حکومەتی سووریا خرایەڕوو.
پەیامی سەرۆک بارزانی لە خۆپیشاندانی کوردان لە شاری بۆنی ئەڵمانیا بۆ پاڵپشتیی رۆژئاڤای کوردستان خوێندرایەوە و تێیدا داوایەکی ئاڕاستەی کۆمەڵگەی نێودەوڵەتی کرد.
سەرۆک بارزانی سەبارەت بە پشتیوانی ڕۆژئاڤا ڕایگەیاند: " گەلی کورد یەک نەتەوەیە و یەک چارەنووسیشمان هەیە، دەبێ هەر کوردێک پشتیوانیی کوردی رۆژئاڤای کوردستان بێت".
سەرۆک بارزانی جەختی لەوە کردەوە، خاکی کوردستان بە ناحەقی دابەشکراوە و دەبێ کۆمەڵگەی نێودەوڵەتی بەرپرسیارێتی خۆی جێبەجێ بکات.
سەبارەت بە ئاگربەستی دیمەش و هەسەدە سەرۆک بارزانی گووتی: "داوا لە حکومەتی سووریا و هەسەدە دەکەم پابەندی ئاگربەست بن و پشت بە دیالۆگ ببەستن، هەروەها مافەکانی گەلی کورد لە دەستووری سووریادا جێگیر بکرێن".
