وەزارەتی پەروەردەی سووریا: هەفتانە دوو وانەی زمانی كوردی دەخوێندرێت

دوای دەرکەوتنی مەرسوومەکەی ئەحمەد شەرع لەبارەی داننان بە زمانی کوردی، وەزارەتی پەروەردەی حکومەتی سووریا ڕێنمایی تایبەت بە خوێندنی زمانی كوردی دەركرد.

وەزارەتی پەروەردە و فێركردنی سووریا رێنمایی تایبەتی بۆ جێبەجێكردنی مەرسوومی ژمارە (13)ـی 2026ـی سەرۆکی سووریا دەركرد، کە بەمشێوەیەیەی خوارەوەیە:

-ئامادەكردنی پرۆگرامی تایبەت بە خوێندنی زمانی كوردی بۆ هەموو قۆناغەكانی خوێندن لە 6 مانگ تێپەڕنەكات.

-فەرامكردنی كارمەندی پەروەردەیی بۆ زمانی كوردی لەسەر میلاك یاخود لە دەرەوەی میلاك.

-ئەنجامدانی راهێنانی پەروەردەیی بەو كەسانەی كە دەبنە وانەبێژی زمانی كوردی.

-زمانی كوردی بە زمانێكی نیشتمانی ئەژمار دەكرێت، رێگەپێدراوە لە خوێندنگە حكومی و ناحکومییەکان، لەو ناوچانەی كە كورد تێیاندا زۆرینەیە.

-ماددەی زمانی كوردی ماددەیەكی ئارەزوومەندانە دەبێت بۆ ئەوانەی بیانەوێت بەم زمانە بخوێنن.

-لە هەموو پۆلەكاندا هەفتانە دوو وانەی زمانی كوردی دەخوێندرێت، بەڵام ئەنجامی دەرچوون یاخود كەوتنی لەسەر ئەژمار ناكرێت.

-بەڕێوەبەری پەروەردەی پارێزگاكان رادەسپێردرێن بە دیاریكردنی ئەو خوێندنگانەی كە زمانی كوردییان تێدا دەخوێندرێت.