سینەم محەممەد: ئەوان دەیانەوێت کورد لە حەلەب نەمێنێت

تا ئێستا تەنیا بەشێکی ئەشرەفییە کەوتووەتە دەست سوپای عەرەبی سووریا و نوێنەری مەسەدە لە واشنتن ئامانجی حکومەتی سووریا لەم هێرشانە ئاشكرا دەکات.

ئەمڕۆ هەینی سینەم محەممەد، نوێنەری مەسەدە لە واشنتن ڕایگەیاند، تاوەکو ئێستا 12 کەس لە شەڕ و پێکدادانەکان شەهیدبوون، هاوکات خێزانێکی 5 کەسیش بەر هێرش کەوتوون و سەرجەمیان گیانیان لەدەستداوە. 

نوێنەری مەسەدە لە واشنتن جەختی کردەوە، کە رێککەوتنی 1ـی نیسان پێشێلکراوە و ئەو هێرشەی کراوە لە بەرژەوەندیی گەلانی سووریا نییە، بەڵام ئەوان "دەیانەوێت کورد لە حەلەب نەمێنێت، ئامانجی حکومەتی سووریا لە هێرشەکان ئەوەیە، گەڕەکە کوردنشینەکان چۆڵ بکرێن و دیموگرافیای ناوچەکە بگۆڕن، ئەمە شتێکی مەترسیدارە."
 

هەر بە گووتەی سینەم محەممەد، تا ئێستا تەنیا بەشێکی ئەشرەفییە کەوتووەتە دەست سوپای عەرەبی سووریا، ئەشرەفییە گەڕەکێکی زۆر گەورەیە و بەشێکی دانیشتووانەکەی عەرەبن، بەڵام ئەو بەشەی کە دانیشتووانەکەی کوردن، لە ژێر دەسەڵاتی ئاسایشی ناوخۆدا ماوەتەوە.

ئەمە لە کاتێکدایە، رۆژی سێشەممەی رابردوو، هێزەکانی سوپای عەرەبی سووریا هێرشیان کردە سەر گەڕەکەکانی ئەشرەفییە و شێخ مەقسوود لە حەلەب و ئاسایشی ناوخۆی گەڕەکەکان کە سەر بە بەڕێوەبەرایەتیی خۆسەرن لە بەرامبەردا بە تووندی بەرگرییان کرد.