تەیف سامی پەیامێکی بڵاوکردەوە

بە بۆنەی ڕۆژی نێودەوڵەتی نەهێشتنی توندوتیژی دژی ژنان، وەزیری دارایی عێراق پەیامێکی لەسەر بەدیهێنانی دادپەروەری و یەکسانی بڵاوکردەوە.

ئەمڕۆ سێشەممە تەیف سامی، وەزیری دارایی عێراق لە پەیامێکدا ڕایگەیاند، جەخت لە بەردەوامی هەوڵەکانیان دەکەنەوە بۆ کۆتاییهێنان بە هەموو جۆرەکانی توندوتیژی و جیاکاری و کارکردن لە ڕێگەی ئەنجوومەنی باڵای کاروباری ژنان بۆ دابینکردنی پشتگیری و بایەخی پێویست بۆ بەرزکردنەوەی ئاستی ژنانی عێراق و بەهێزکردنی پێگەیان لە کۆمەڵگەدا.

وەزیری دارایی عێراق جەختی کردەوە، پشتگیری تەواوی خۆیان دەردەبڕن بۆ ڕاگرتنی توندوتیژی بە هەموو شێوەکانییەوە، دروستکردنی ژینگەیەکی سەلامەت و پشتیوان بۆ ژنان، بەدیهێنانی دادپەروەری و یەکسانی و لابردنی ئەو ئاستەنگانەی کە ڕووبەڕوویان دەبێتەوە بەهۆی کاریگەرییە نەرێنییەکانی ئەو بارودۆخە نائاساییە سەختانەی کە وڵاتەکەمان پێشتر بەسەریدا تێپەڕیوە.

ئەمڕۆ 25-11-2025، ڕۆژی جیهانی  رۆژی جیهانیی نەهێشتنی تووندوتیژیی دژی ئافرەتانە و هەموو ساڵێک تێیدا چالاکی جۆراو جۆر بۆ ئەو مەبەستە ئەنجام دەدرێت.


بەگوێرەی ڕاپۆرتی نەتەوە یەکگرتووەکان، ساڵی ڕابردوو 83 هەزار ژن و کچ لە هەموو جیهان کوژراون، لەو ژمارەیە 60%، واتە 50 هەزاریان بە دەستی کەسانی نزیک خۆیان، وەک هاوژین، خۆشەویست و کەسوکاریان کوژران، کە دەکاتە 137 ئافرەت لە ڕۆژێکدا و یەک ئافرەت لە هەر 10 خولەکێکدا.