ئۆتۆمبێلێکی پڕ لە کارتی دەنگدان دەستی بەسەردا گیرا

لە بەغدا چەند کەسێک بە مەبەستی بەکارهێنانی کارتی دەنگدان بە شێوەیەکی نایاسایی، دەستگیرکران.

ئاژانسی هەواڵگری و لێکۆڵینەوەی فیدراڵی ڕایگەیاند، بۆ پاراستنی ئاسایشی پرۆسەی هەڵبژاردن، یەکەکانی دەزگای هەواڵگری و لێکۆڵینەوەی فیدراڵی دەستیان بەسەر ئۆتۆمبێلێکدا گرت کە ژمارەیەک کارتی هەڵبژاردنی تێدابوو و هەڵگرانیان لە پارێزگای بەغدا دەستگیرکرد.

لە درێژەی ڕاگەیەندراوەکەی ئاژانسی هەواڵگری و لێکۆڵینەوەی فیدراڵی دا هاتووە، دەستگیرکراوەکان دانیان بە تاوانەکانیان داناوە و مەبەستییان بووە ئەم کارتانە بۆ کاری نایاسایی بەکار بهێنن.

ئەمە لە کاتێکدایە، دوێنێ یەکشەممە 9-11-2025 پڕۆسەی هەڵبژاردنی تایبەت بەڕێوەچوو و تێیدا بەگوێرەی ئەنجامە بەراییەکانی دەنگدانی تایبەت، پارتی بە زیاتر لە 90 هەزار دەنگ و یەکێتی بە زیاتر لە 70 هەزار دەنگ یەکەم و دووەمن، وابڕیاریشە سبەی سێشەممە پڕۆسەی هەڵبژاردنی گشتی بەڕێوەبچێت.