مەسرور بارزانی پشتیوانی خۆی بۆ سەرۆکی یانەی هەولێر دووپاتکردەوە

سەرۆکوەزیران مەسرور بارزانی پشتیوانی خۆی بۆ یانەی هەولێر و سەرۆکی یانەی هەولێر دووپاتکردەوە و دڵخۆشی خۆی بە ئەنجامەکانی ئەم وەرزەی یانەکە ئاشکرا کردووە.

دوێنێ لە دووەم رۆژی بەڕێوەچوونی پێشبرکێی ئەسپسواری لە هەولێر، د. سەفی یاسین، سەرۆکی یانەی هەولێر چاوی بە سەرۆکوەزیران مەسرور بارزانی کەوتووە و بەپێی زانیارییەکانی پایتەخت میدیا، سەرۆکی حکومەتی هەرێمی کوردستان پشتیوانی خۆی بۆ یانەی هەولێر و سەرۆکی یانەی هەولێر دووپاتکردووەتەوە.

د. سەفین یاسین، سەرۆکی یانەی هەولێر بە پایتەخت میدیای ڕاگەیاند، سەرۆکی حکومەتی هەرێم زۆر بە ئەنجامەکانی سەرەتای ئەم وەرزەی یانەی هەولێر دڵخۆشبووە و پیرۆزبایی سەرکەوتنەکانی لێکردین و هیوای بەردەوام بوونی بۆ خواستین.

دوای وەرگرتنی پۆستی سەرۆکی یانەی هەولێر لە لایەن د. سەفین یاسین، یانەی هەولێر بە بەهای نزیکەی دوو ملیار دینار چەندین گرێبەستی گەورەی ئەنجام دا و لە سەرەتای ئەم وەرزە، بە ئاستێکی زۆر باش دەرکەوتووە و لە کۆی چوار یاریی، توانیویەتی لە سێ یاریی سەرکەوێت و لە یارییەک یەکسان بێت.