تۆمەتبارانی ڕووداوەکەی دوێنێی نەخۆشخانەی شار دەستگیرکران

پۆلیسی سلێمانی دەستگیرکردنی سێ تۆمەتباری ڕاگەیاند کە دوێنێ شەو لەبەردەم نەخۆشخانەی شار چەکی پاسەوانی نەخۆشخانەیان برد و هەڵاتن.

درەنگانی شەوی ڕابردوو سێ هاووڵاتی دەچنە نەخۆشخانەی شار لە سلێمانی بە مەبەستی سەردانی کردنی نەخۆشیک، بەڵام لە لایەن پاسەوانانی نەخۆشخانە ڕێگریان لێ دەکرێت و نکرێنە ژووەوە چونکە کاتی یاسایی سەردانی کردنی نەخۆش کۆتایی پێهاتووە، دوای دەمەقاڵێیەکی زۆر و دروست بوونی ئاڵۆزی یەک لەو سێ کەسە چەکی پاسەوانەکە دەبات و دواتر ڕادەکەن.

پۆلیسی سلێمانی لەم بارەیەوە ڕوونکردنەوەی تەواو دەدات و دەستگیرکردنی تۆمەتبارەکان ڕادەگەیەنێت، دەقی ڕاگەیاندراوەکە:

سێ تۆمەتبار لەسەر ڕووداوەكەی شەوی ڕابردووی نەخۆشخانەی شار لەلایەن مەفرەزەکانی بەشی پۆلیسی فریاکەوتنی بەڕێوەبەرایەتیمان و بنکەی پۆلیسی نەخۆشخانەوە دەستگیرکران.
شەوی ڕابردوو پاش کاتژمێر ١٢ ی نیوەی شەو سێ‌ كەس بەمەبەستی سەردانیکردن دەچنە نەخۆشخانەی شار . 
بەهۆكاری ئەوەی سەردانیكردن بەپێی یاسا و ڕێنماییە بەركارەكان لەو کاتەدا ڕێگە پێدراو نییە ، کارمەندی پاسەوانی بنکەی پۆلیسی نەخۆشخانە ڕێکاری گونجاو دەگرێتە بەرو ڕێگرییان لێدەكات ، لەگەڵ ئەوەدا کە دەستگیرکراوان یەکێکیان دور لە ڕاستی خۆی بە پزیشکی نەخۆشخانە دەناسێنێت و یەکێکیشیان لەژێر کاریگەری مەی نۆشیدایە ، گرژی و ئاڵۆزی دەخوڵقێنن و هێرش دەكەنە سەر کارمەندەکەمان و یەكێكیان چەكی كارمەندەکە دەڕفێنێت و تەقە دەكات و هەڵدێت .
دەستبەجێ‌ لەلایەن بنکەی پۆلیسی نەخۆشخانەوە دووان لە تۆمەتبارەكان دەستگیرکران و لەماوەیەكی زۆر كەمیشدا تۆمەتباری سێیەم لە لایەن مەفرەزەكانی بەشی پۆلیسی فریاكەوتنی بەڕێوەبەرایەتیمانەوە لە گەڕەكی كوردستان دەستگیركرا .
لە ئێستادا هەریەك لەتۆمەتباران :
س ، س لەدایكبووی 1969
ب ، س ، س لە دایكبووی 2006
ب، س، س لەدایكبووی 2004 
بەبڕیاری بەڕێز دادوەر بەپێی ماددەی (٣١/٤٠٥) لەیاسای سزاکانی عێراقی ڕاگیراون و لێكۆڵینەوە لەگەڵیان بەردەوامە .
بەڕێوەبەرایەتی پۆلیسی پارێزگای سلێمانی