ئایا ئەکبەر حاجی ڕۆستەم تیرۆر کراوە؟
باس لە تیرۆر کردنی دەکرێت بەڵام کەسوکارەکەی دەڵێن هیچ کێشەیەکمان لەگەڵ کەس نەبووە؛ بزانە ئەکبەر حاجی ڕۆستەم بۆچی کوژراوە
باوکی 24 منداڵ، کەسێکی کۆمەڵایەتی و نیشتمانپەروەر و کەسایەتیی دیار و ناسراوی گەرمیان بوو، ئەکبەر حاجی ڕۆستەم، شەوی ڕابردوو بە شێوەیەکی گوماناوی لە باخەکەی خۆی تەقەی لێکرا و کوژرا، هەرچەندە تاوەکو ئێستا دۆسیەکە یەکلایی نەکراوەتەوە، بەڵام هەندێک سەرچاوە و نزیکانی ئەکبەر حاجی ڕۆستەم دەڵێن، ناوبراو بە پیلانێکی ناجوامێرانە تیرۆر کراوە، هەر بۆیە زوو پۆلیس و ئاسایش دەستیان بە لێکۆڵینەوە لە ڕووداوەکە کردووە تاوەکو سەرەداوێک لەوبارەیەوە بدۆزنەوە، هەروەها چەند سەرچاوەیەکیش باس لەوە دەکەن، کە گوایە دزیی لێکراوە و کوژراوە، چونکە ئەو کەسەی کوشتوویەتی پارە و مۆبایل و ئۆتۆمبێلەکەی بردووە.
یەکێک لە کوڕەکانی ئەکبەر حاجی ڕۆستەم بۆ پایتەخت میدیا ڕایگەیاندووە، کە باوکی هیچ کێشەیەکی کۆمەڵایەتیی لەگەڵ هیچ کەسێک نەبووە و داواکارییەکی هەیە.
تا ئێستا و بە فەرمی، هیچ هۆکارێک بۆ کوژرانی ئەکبەر حاجی ڕۆستەم ڕانەگەیەندراوە، کەسە نزیکەکانیشی پێیان وایە تیرۆر کراوە و داواکارن هەرچی زووتر تاوانباری ڕووداوەکە بدۆزرێتەوە و دەستگیر بکرێت.
