ئەنجوومەنی دەوڵەت بڕیارێکی لە بەرژەوەندی هەرێم بۆ پرسی مووچە دا

بە بەشداری دوو نوێنەری حکومەتی هەرێمی کوردستان، جارێکی دیکە ئەنجوومەنی دەوڵەت کۆدەبێتەوە و پرسی ناکۆکییەکانی نێوان هەرێم و بەغدا لە بارەی داهاتی نانەوتی یەکلا دەکاتەوە.

سبەی سێشەممە، کاتژمێر 9:00ـی بەیانی کۆبوونەوەیەکی فراوانی ئەنجوومەنی دەوڵەت بەڕێوەدەچێت و تێیدا دوو نوێنەری حکومەتی هەرێمی کوردستان بەشدار دەبن، یەکێکیان شارەزای یاساییە و ئەوەی دیکەش ژمێریارییە، ئەمەش تا ڕوونکردنەوەی پێویست بدەن و بەرگری لە بۆچوون و داواکارییەکانی حکومەتی هەرێم بکەن.

هاوکات پێش نیوەڕۆی دوێنێ بۆ یەکلاکردنەوەی پرسی داهاتی نانەوتی هەرێمی کوردستان، ئەنجوومەنی دەوڵەت یەکەم کۆبوونەوەی ڕاوێژکاری ئەنجامدا و لەو کۆبوونەوەیە بڕیاردا ڕۆژی سێ شەممە، 16-9-2025، کۆبوونەوەیەکی فراوانتر ئەنجام بدرێت.

بانگێشتکردنی ئەم دوو نوێنەرە لەسەر داواکاری حکومەتی هەرێمی کوردستان بووە، چونکە بە پێی ئەو نووسراوەی سەرۆکوەزیرانی عێراق بۆ ئەنجوومەنی دەوڵەت نێردراوە، لە بەرژەوەندی حکومەتی فیدڕاڵ نووسراوە و پاساوی یاساییان بۆ خۆیان هێناوەتەوە.