دوای ئەوەی دوێنێ بە بڕیاری دادوەر سوچەڕێک لە لایەن پۆلیسی دارستانی کەلارەوە دەستبەسەر کرا، ئەمڕۆ بە فەرمانی فەرمی دادوەری لێکۆڵینەوە ئاژەڵەکە لەگەڵ دوو باڵندەی دیکە گەڕێندرانەوە بۆ باوەشی سروشت و ژینگەی ناوچەکە.
بەڕێوەبەرایەتی پۆلیسی دارستان و ژینگەی گەرمیان بڵاویکردەوە، دوای ئەوەی دوێنێ چوارشەممە هاووڵاتییەک بەشی پۆلیسی دارستان و ژینگەی کەلاری لە گەڕەکی حەمرین ئاگادار کردەوە لە هەبوونی ئاژەڵێکی کێوی لە جۆری (سوچەڕ)، مەفرەزەکانی پۆلیس پاش وەرگرتنی ڕەزامەندی دادوەری لێکۆڵینەوەی کەلار، سووچەڕەکەیان هێنایە بەشی کەلار.
بەڕێوەبەرایەتی پۆلیسی دارستان و ژینگەی گەرمیان ڕوونیکردەوە، ئەمڕۆ بە فەرمانی دادوەری لێکۆڵینەوە، لەلایەن ڕائید سیامەند حەمە ساڵح، بەڕێوەبەری بەشی پۆلیسی دارستان و ژینگەی کەلار، سووچەڕەکە گەڕێندرایەوە بۆ باوەشی سروشت.
لە کۆتایی ڕاگەیەندراوەکەی بەڕێوەبەرایەتی پۆلیسی دارستان و ژینگەی گەرمیان هاتووە، لەگەڵ ئەو ئاژەڵەدا، دوو باڵندە لە جۆری (واشە) کە ئەوانیش لەلایەن هاووڵاتییەکەوە هێنرابوون، ئازاد کران بۆ نێو سروشت و ژینگەی ناوچەکە.