نەورۆز لەبەردەم دوایین تاقیکردنەوەی وەرزدا

یانەی نەورۆز ئامادەکارییەکانی بۆ ئەنجامدانی دوایین یاریی خۆی لەم وەرزەی خولی ئەستێرەکانی عێراق تەواو دەکات، کاتێک لە گەڕی 38 و کۆتایی خولەکەدا، دەبێتە میوانی یانەی نەفت، یارییەکە کاتژمێر 6:00ی ئێوارە بەڕێوەدەچێت و نەورۆز دەیەوێت بە بەدەستهێنانی سێ خاڵ، پێگەی خۆی لە پلەی هەشتەمی ڕیزبەندییەکەدا جێگیر بكات.

نەورۆز لە کاتێکدا ئەم وەرزە بەکۆتا دەهێنێت کە بە قۆناغێکی سەخت و پڕ لە هەڵبەز و دابەزدا تێپەڕی، لە سەرەتای وەرزدا یانەکە بەدەست قەیرانی گەورەوە دەیناڵاند، بەجۆرێک مەترسی هەڵوەشاندنەوەی یەکجاریی لەسەر بوو، بەڵام لە قۆناغی دووەمی خولەکەدا، تیپەکە توانی هاوسەنگی خۆی بەدەستبهێنێتەوە و گۆڕانکارییەکی گەورە لە ئاست و ئەنجامەکانیدا تۆمار بکات، کە لە کۆتاییدا لە ناوچەی پێشەنگی ڕیزبەندییەکەدا جێگەی خۆی کردەوە.

یانەی نەورۆز لە کۆی 37 گەڕی ڕابردوودا، خاوەنی 54 خاڵە و لە پلەی هەشتەمدایە. ئامارەکانی یانەکە لەم وەرزەدا بەم شێوەیەن:

- بردنەوە: 16 یاری

- یەکسانبوون: 6 یاری

- دۆڕان: 15  یاری

لە مێژووی ڕووبەڕووبوونەوەکانی هەردوو تیپدا، نەورۆز و نەفت 10 جار ڕووبەڕووی یەک بوونەتەوە، باڵادەستی بۆ نەورۆز بووە بە تۆمارکردنی 4 سەرکەوتن، لە بەرامبەردا 2 جار دۆڕاوە و لە 4 یاریشدا یەکسان بوون.

بۆ ئەم یارییە کۆتاییە، نەورۆز لە تواناکانی نێتۆ ئاکارا هێرشبەری بەرازیلی بێبەش دەبێت، ناوبراو بەهۆی پێکانێکی قورسەوە وەرزەکەی پێشوەختە کۆتایی پێهاتووە و ناتوانێت هاوکاریی هاوڕێکانی بکات لە گەشتیاندا بۆ بەدەستهێنانی دوایین سێ خاڵی وەرزەکە.