لیڤەرپوول ڕاهێنەرەکەی دووردەخاتەوە

ئیدارەی یانەی لیڤەرپوولی ئینگلیزی بڕیاری کۆتاییدا بە دوورخستنەوەی ئاڕنە سڵۆت، ڕاهێنەری هۆڵەندیی یانەکە لە پۆستەکەی، دوای ئەوەی هەڵسەنگاندنی تەواو بۆ ئەنجامەکانی ئەم وەرزەی تیپەکە کراوە.

فابریزیۆ ڕۆمانۆ، ڕۆژنامەنووسی ناسراو و پسپۆڕی بازاڕی گواستنەوەی یاریزانان و ڕاهێنەران بڵاویکردەوە، کارگێڕی ڕێدز گەیشتووەتە ئەو بڕوایەی کە قۆناغی سڵۆت لەگەڵ یانەکە کۆتایی هاتووە و بڕیارویانداوە دەستبەجێ لە کارەکەی دووری بخەنەوە. ئەم بڕیارەش دوای تێپەڕبوونی وەرزێک دێت کە تێیدا یانەکە هەڵسەنگاندنی وردی بۆ ئاست و دەستکەوتەکانی تیمەکە کردووە.

بەگوێرەی زانیارییەکانی ئەو ڕۆژنامەنووسە ئیتاڵییە، بەرپرسانی لیڤەرپوول لە ئێستاوە پلانەکانیان بۆ قۆناغی داهاتوو داڕشتووە و ئاندۆنی ئیراولا، ڕاهێنەری پێشووی یانەی بۆرنمۆسی ئینگلیزی، بەربژێری سەرەکی و یەکەمە بۆ ئەوەی لە وەرزی نوێدا ئەرکی ڕاهێنەرایەتی یانەی لیڤەرپوول بگرێتە ئەستۆ.