بەرگری شارستانی هەولێر: لەکاتی لافاو کارەبای ماڵەکەت بکوژێنەوە

ئەگەری مەترسی دروستبوونی لافاو لەسەرجەم شار و شارۆچکەکانی هەرێمی کوردستان هەیە و بەرگری شارستانی هەولێر ڕێنمایی خۆ پاراستنی بۆ هاووڵاتییان بڵاوکردەوە.

ڕێنماییەکانی بەرگری شارستانی هەولێر لە کاتی لافاو بەم شێوەیەی خوارەوە:

- پلانی فریاکەوتن بۆ خێزانەکەت دانێ، لە کاتی ڕوودانی لافاو ئەگەر لێک دابڕان لە جێگایەک کۆ ببنەوە.

- کەرەستەی پێویست (ئاوی خواردن، خواردن، ڕوناکی، باتری) ئامادە بکە.

 - دەروازە و شوێنە نزمەکان بە کیسی خاک بپارێزە لە کاتی لافاو.

- لە شوێنی بەرز بمێنەوە و دوور بکەوە لە ناوچە نزمەکان و ئەو ناوچانەی ئاوی تێدا کۆدەبێتەوە.

- هەرگیز مەچۆ ناو ئاوی لافاو (بە پێ یان ئۆتۆمبێل) چونکە مەترسی بۆ سەر ژیانت دروست دەکات.

- کارەبای ماڵەکەت یان شوێنی کارەکەت بکوژێنەوە، چونکە مەترسی لەسەر ژیانت دروست دەکات ئەگەر مەترسی هەیە.

 - لە ڕێگای دەزگاکانی ڕاگەیاندن یاخود بڵاو کراوە گوێ لە ڕێنماییەکانی هێزە فریاکەوتنەکان بگرە.

 - ئەگەر فەرمانی بەجێهێشتن درا، زوو جێبەجێی بکە و ئەو ناوچەیە چۆڵ بکە کە مەترسی لافاوی لەسەرە.

- تەلەفۆنەکەت بارگاوی بکە و هەوڵ بدە پاوەربانکی زیادە بارگاویت هەبێ.

- دوور بکەوە لە چەم و ڕێگاکانی تێکچوەکان و ئەو کەناڵ و ڕێڕەوانەی پێشتر ئاویان پێدا ڕۆشتووە.

- بۆ گەشت و سەیران ڕێگاکانی دەرەوەی شار یاخود ناوچە شاخاویەکان بەکار مەهێنە.

ماوەی چەند ڕۆژێکە ڕاپۆرتە کەشناسیەکان هۆشداری لە هاتنی لافاو دەدەن و بارانێکی بەخوڕ سەرجەم ناوچەکانی گرتووەتەوە، تەنانەت لە بەشێک لە ناوچەکان ئاو کۆبووەتەوە.

بەرگری شارستانی هەولێر ئەوەشی خستەڕوو، لە حاڵەتی دروست بوونی لافاو پەیوەندی بە ژمارەکانی بەرگری شارستانی  115 – 125 بکە.