بە تۆمەتی هێرشکردنە سەر کارمەندانی فڕۆکەوانی و پۆلیس لە کاتی گەشتێکی ئاسمانیدا، دەسەڵاتدارانی ئەمنی لە ئەمریکا دەستگیرکردنی خانمە ئەکتەرێکی دیاری سینەمایان ڕاگەیاند.
ئەمڕۆ دەستەی بەندەرەکانی نیویۆرک و نیوجێرسی بڵاویان کردەوە، پۆلیس سەلما بلێر، خانمە ئەکتەری ئەمریکیی تەمەن 54 ساڵانی لە فڕۆکەخانەی نێودەوڵەتیی جۆن کەنەدی لە نیویۆرک دەستبەسەر کردووە، ئەمەش دوای نیشتنەوەی فڕۆکەیەکی هێڵی ئاسمانیی دێڵتا کە لە لۆس ئەنجلۆسەوە دەهات.
ئەم خانمە ئەکتەرە تۆمەتبار کراوە بە بریندارکردنی دوو لە کارمەندانی خزمەتگوزاریی فڕۆکەوانی لە کاتی گەشتەکەدا، لەگەڵ لێدانی ئەفسەرێکی پۆلیس و پەرستارێک لە کاتی گواستنەوەی بۆ نەخۆشخانە، هاوکات ناوبراو لە بەردەم دادگا بێتاوانیی خۆی لە تۆمەتە ئاڕاستەکراوەکان ڕاگەیاند.
جگە لە تۆمەتە ناوخۆییەکان، سەلما بلێر ڕووبەڕووی لێکۆڵینەوە و تۆمەتی فیدڕاڵیش دەبێتەوە کە لەلایەن نووسینگەی لێکۆڵینەوەی فیدڕاڵی (FBI) بەڕێوە دەچێت. لەو چوارچێوەیەدا، هێڵی ئاسمانیی دێڵتا لە ڕاگەیەندراوێکدا دووپاتی کردەوە، بە هیچ شێوەیەک چاوپۆشی لە ڕەفتاری نایاسایی و تێکدەرانە ناکات و سەلامەتیی گەشتیاران و کارمەندان لە پێشینەی کارەکانیانە.
شاندی بەرگریی ئەو هونەرمەندە لە بەردەم دادوەر ڕوونیان کردەوە، ڕووداوەکە دەرئەنجامی بارودۆخێکی کتوپڕی تەندروستی بووە، چونکە ناوبراو تووشبووی نەخۆشیی دەماریی سڕبوونی فرەییە (MS) و لە کاتی گەشتەکەدا چەند ژەمێکی دەرمانە سەرەکییەکانی نەخواردووە.
پارێزەرەکەی ئاماژەی بەوە کرد، ماندووبوونی زۆر، کێشانی سەری بە تەنێک لە ناو فڕۆکەکە و بەرزیی ئاسمان بوونەتە هۆی لەدەستدانی توانای ئاڕاستەکردن و تێکچوونی تەواوی هۆشیاری. دادوەریش بە کەفالەتی 20 هەزار دۆلاری نەختینەیی ئازادکردنی ناوبراوی پەسەند کرد تا بەرواری دانیشتنی داهاتوو لە مانگی یەکی ساڵی داهاتوو.
سەلما بلێر، خانمە ئەکتەری ئەمریکی، لە ساڵی 2018ـەوە ئاشکرای کرد کە تووشی نەخۆشیی درێژخایەنی پەرشوبڵاوی دەماری (MS) بووە، و بەردەوام لە تۆڕە کۆمەڵایەتییەکاندا باسی لە ئاستەنگییەکانی ئەو نەخۆشییە بۆ هۆشیاری و جووڵەی لەش دەکرد.
