لە عێراق دەوامی ساڵی نوێی خوێندن دەستی پێکرد و زیاتر لە 12 ملیۆن قوتابی ڕوویان لە دەوروبەری 30 هەزار قوتابخانە کرد.
ئەمڕۆ کەریم سەید، گوتەبێژی وەزارەتی پەروەردەی عێراق ڕایگەیاند، تەواوی ئامادەکارییەکان بۆ دەستپێکردنی پڕۆسەی فێرکردنی ساڵی 2026 - 2027 جێبەجێ کراون و نزیکەی یەک ملیۆن و 200 هەزار منداڵ، بۆ یەکەمجار چوونەتە پۆلی یەکەمی سەرەتایی.
کەریم سەید ڕوونی کردەوە، بۆ یەکەمین جار لە مێژووی پەروەردەی عێراقدا، پۆلی تایبەت بە منداڵانی خوار پێنج ساڵ لە قوتابخانە حکومییەکاندا کراوەتەوە، بە مەبەستی ئامادەکردنی دەروونی و زانستییان پێش چوونە قۆناغی فەرمی، سەرباری ئەم هەنگاوانە.
لە کەرکووک پرۆسەی خوێندنی کوردی گرنگییەکی بەرچاوی پێ درا و بە بەرزکردنەوەی ئاڵای کوردستان پێشوازی لە ساڵی نوێ کرا، گەورەترین ئاستەنگی بەردەم وەزارەتی پەروەردە نەبوونی بینای پێویستە و هێشتا عێراق پێویستی بە نزیکەی هەشت هەزار قوتابخانەی نوێ هەیە بۆ پڕکردنەوەی کەمیی پۆلەکان.
بەپێی زانیارییە فەرمییەکان، لە هەرێمی کوردستان زیاتر لە 104 هەزار قوتابی لە 562 باڵەخانەی خوێندندا لەلایەن 8 هەزار و 200 مامۆستاوە وانەیان پێ دەوترێتەوە، بەهۆی ئامادەکارییەکانی حکومەتی هەرێم لە دابینکردنی زیاتر لە یەک ملیۆن و 200 هەزار پەڕتووک و بەدەستهێنانی ڕێژەی دەرچوونی 82% لەلایەن فێرخوازانەوە، لێشاوێکی گەورەی گەڕانەوەی خوێندکاران لە قوتابخانە عەرەبییەکانەوە بەرەو پۆلە کوردییەکان تۆمار کراوە.
لە ساڵانی ڕابردوودا، کۆمپانیا بیانییەکان لە چوارچێوەی ڕێککەوتننامەی نێودەوڵەتیدا هەزار قوتابخانەی مۆدێرنیان لە عێراق دروست کرد، لە ئێستاشدا کارکردن بۆ بنبڕکردنی قوتابخانە سەندەویچ پەنەلەکان (کابینەکان) بەردەوامە، سەرەڕای دەستپێکی پرۆسەکە، بەرپرسانی پەروەردەی عێراق نیگەرانیی خۆیان لە کەمیی هەزاران باڵەخانەی خوێندن نەشاردەوە.
