دەستلێدانی خۆڵ، درەخت و ڕووەکەکان بەردی بناغەی بەهێزکردنی سیستەمی بەرگریی جەستەی مرۆڤ پێک دەهێنن.
ئەمڕۆ تۆڕی هەواڵی بی بی سی بڵاوی کردەوە، توێژەرانی پەیمانگەی ژینگەی فینلەندا سەلماندوویانە بەرکەوتنی پێست لەگەڵ خۆڵ و زەوی پاش 20 چرکە هەمەجۆریی باکتریای بەسوودی سەر پێست زیاد دەکات، لێکۆڵەران کاریگەریی ڕاستەوخۆی ئەم بەرکەوتنانەیان لەسەر بەهێزبوونی سیستەمی بەرگریی منداڵان و گەورەساڵان ڕوون کردووەتەوە.
تەواوی تاقیکردنەوەکان لەسەر منداڵانی باخچەی ساوایانی ڤاهڤیستو لە فینلەندا ئەنجام دراون، شوێنێک لە ناوەڕاستی دارستانەکاندا کە تێیدا منداڵان ڕۆژانە یاری لەناو قوڕ و گەڵاکاندا دەکەن، ئەنجامی شیکاریی نموونەکانی خوێن و پێستی منداڵان بەراورد بەوانەی لە حەوشەی چیمەنتۆکراودا یارییان کردبوو، دەریخستووە جۆرەکانی باکتریای بەسوود لەسەر پێستیان زیاتر بووە و نیشاندەرەکانی ڕێکخستنی بەرگری لە خوێنیاندا بە ڕوونی زیادی کردووە.
توێژینەوەکان دەریانخستووە ئەم سوودانە تەنیا بۆ منداڵان نین، بەڵکو هەموو تەمەنەکان سوودمەند دەبن، ئەو کارمەندانەی لە نووسینگەکانیاندا دیواری سەوزی ڕووەکی دروست کرابوو، دوای 2 هەفتە ئاستی هەوکردن لە خوێنیاندا دابەزیوە، باکتریای گاماپرۆتیۆباکتریا ڕۆڵێکی سەرەکی دەگێڕێت لە دروستکردنی خڕۆکە سپییەکان و ڕێگری لە نەخۆشییە خۆبەگرییەکان دەکات، ئەمەش تیۆری هەمەجۆریی بایۆلۆجی دەسەلمێنێت.
پەیوەندیی دروستکردنی ڕاستەوخۆ لەگەڵ سروشت و خاکی پاک ژینگەیەکی تەندروست بۆ بەرگریی جەستە دەخولقێنێت، زانایان ئامۆژگاری دەکەن هاووڵاتییان لە شارەکاندا بەردەوام دەست بە درەخت و خاکی پاک بپێون بۆ دووربوون لە نەخۆشییە درێژخایەنەکان.
