دکتۆر عەمید خالد عەبدولحەمید لە کتێبێکی نوێدا بە زمانی ئینگلیزی، لێکۆڵینەوە لە داهاتووی بڕیاری پزیشکی و ڕۆڵی زیرەکیی دەستکرد لە چارەسەرکردنی نەخۆشدا دەکات.
ئەمڕۆ ڕۆژنامەی شەرقولئەوسەت بڵاوی کردەوە، ئەم کتێبە بە ناونیشانی 'دەسەڵاتی کلینیکی لە سەردەمی ئەلگۆریتمەکاندا' بڵاو کراوەتەوە و تیشک دەخاتە سەر چۆنیەتیی بەکارهێنانی زیرەکیی دەستکرد بۆ هاوکاریکردنی پزیشکان بێ ئەوەی بەرپرسیارێتیی پیشەییی مرۆڤ پەک بخرێت.
نووسەر لە کتێبەکەیدا جەخت لەوە دەکاتەوە کە نابێت زیرەکیی دەستکرد جێگەی پزیشک بگرێتەوە، بەڵکو دەبێت وەک هاوبەشێکی لێهاتوو بۆ دەستنیشانکردنی نەخۆشی و پێشبینیکردنی چارەسەر بەکار بهێنرێت. هەروەها کتێبەکە باس لە کێشە یاسایییەکان، شەفافیەت و دادپەروەری لە بەکارهێنانی ئەم تەکنەلۆژیا نوێیەدا دەکات.
بەشێکی تایبەتی کتێبەکە بۆ ئەزموونی وڵاتانی عەرەبی و بەتایبەت عەرەبستانی سعودی تەرخان کراوە. سعودیە یەکێکە لەو دەوڵەتانەی کە بنەما نیشتمانییەکانی بۆ بەکارهێنانی بەرپرسانەی زیرەکیی دەستکرد داڕشتووە و وەبەرهێنانی گەورەی لە ژێرخانی دیجیتاڵیدا کردووە.
دکتۆر عەمید خالد ئاماژە بە گرنگیی پەرەپێدانی مۆدێلەکانی زیرەکیی دەستکرد دەکات کە لەگەڵ تایبەتمەندییە زمانەوانی، کولتووری و جینییەکانی دانیشتووانی ناوچەکە بگونجێن. ئەم کتێبە وەک سەرچاوەیەکی گرنگ بۆ پزیشکان، توێژەران و داڕێژەرانی سیاسەتی تەندروستی دادەنرێت.
دکتۆر عەمید خالد عەبدولحەمید، پزیشکی ددان و توێژەرە لە بواری ئەخلاقیاتی زیرەکیی دەستکرد لە تەندروستیدا. ئەو ئێستا مامۆستای میوانە لە زانکۆی ڕۆژهەڵاتی لەندەن و خاوەنی چەندین بەرهەمی زانستییە لەسەر داهاتووی بڕیاری پزیشکی و سیستەمی زیرەک.
