لە کاردانەوە بە هێرشە درۆنییەکەی ئەمڕۆ بۆ سەر نووسینگەی سەرۆکی حکومەتی هەرێمی کوردستان و شوێنی مانەوەی بەڕێوەبەری دەزگای پاراستنی هەرێمی کوردستان، بارەگای بارزانی لە ڕاگەیەندراوێکدا ئەو هێرشانەی ئیدانە کرد.
بارەگای بارزانی ڕایگەیاندووە، هەرێمی کوردستان هیچ کاتێک بەشێک نییە لە شەڕ و ئاڵۆزییەکانی ناوچەکە و ئەم جۆرە هێرشانە ناڕەوان و هیچ بیانوویەک هەڵناگرن.
دەقی ڕاگەیەندراوەکەی بارەگای بارزانی
ڕاگەیێندراوێك لە بارەگای بارزانییەوە
بەناوی خودای بەخشندە و میهرەبان
زۆر بە توندی ئیدانەی ئەو هێرشە درۆنیە دەكەین كە بەرەبەیانیی ڕۆژی دووشەممە 17ی ئابی 2026 لەو دیوی سنووری ئێرانەوە كرایە سەر نووسینگەی سەرۆکوەزیران و شوێنی حەوانەی بەڕێوەبەری ئاژانسی پاراستنی لە پیرمام.
هەرێمی كوردستان هیچ کاتێک بەشێك نەبووە لەم شەڕ و گرژییانەی لە ناوچەكەدا هەیە و ئەم جۆرە هێرشە ناڕەوایانە كە هیچ بیانوویەک هەڵناگرن، هەوڵدانە بۆ تێكدانی سەقامگیریی هەرێمی كوردستان. بە دڵنیاییەوە بەكارهێنانی درۆن و موشەك چارەسەری كێشەكان ناكات.
بارەگای بارزانی
17ی ئابی 2026
